إزاي تلعبوا أنور وعزوز؟

البداية

1. من الصفحة الرئيسية اختاروا اللعبة: تالتة ابتدائي أو رابعة ابتدائي أو خامسة ابتدائي أو سادسة ابتدائي. في رابعة وخامسة اختاروا المادة: عربي أو دراسات.
2. دوسوا «ابدأ المغامرة»، واكتبوا اسم الطفل واختاروا «أنا ولد» أو «أنا بنت». أنور وعزوز بيكلّموا الطفل باسمه طول الرحلة.
3. الدروس (أو المحطات في عربي ودراسات خامسة وسادسة) على خريطة بالترتيب. أول درس مفتوح، وكل درس بيتفتح لما الطفل يخلّص جولة الدرس اللي قبله.
4. تالتة لعبة تالتة عربي بس، ومعمولة لسن ٧–٨ سنين: حروف كبيرة وتشكيل كامل، واختيارين أو تلاتة بس في كل سؤال، ومفيش قلوب — لو الطفل غلط عزوز بيدّي تلميح ومحاولة تانية. وفيها لعبة «المقاطع الصوتية»: الطفل يلمس المقاطع بالترتيب فتتكوّن الكلمة.
5. قبل كل درس بتظهر «ماذا ستتعلم؟» والمكافأة، و«شوف الحكاية» (اختياري). دوسوا «ابدأ» ويلا!

لو غلطت؟

• رابعة كل جولة فيها ٣ قلوب. الغلطة بتاخد قلب، ولو القلوب خلصت الطفل يعيد الجولة.
• دراسات خامسة سادسة مفيش قلوب (عربي خامسة زي عربي رابعة). عزوز بيدّي تلميح والطفل يجرّب تاني، والصح في المحاولة التانية بنص النقط.
• عربي خامسة في محطة الاستماع الأولى «سرّ الحياة» فيه زرار «🎧 للأهل: فيديو نص الاستماع من الوزارة»: بيفتح فيديو الوزارة على يوتيوب برّه اللعبة، فافتحوه مع طفلكم. وفيه أسئلة من كتاب «الأداءات والتقييمات» (التقييم الأسبوعي) جوّه جولات كل درس.
• في الآخر، «راجع أخطاءك» بيلعّب الطفل الأسئلة اللي غلط فيها.

النجوم والمكافآت

• ١٠ نقط لكل إجابة صح، و+٥ لما الطفل يجاوب ٣ صح ورا بعض.
• نجمة لـ٥ من ١٠، ونجمتين لـ٨، وتلات نجوم لـ٩ أو ١٠.
• ٨ من ١٠ أو أكتر بتكسب قطعة: من مفتاح الكنز أو مفتاح اللغة العربية في رابعة، ومن خريطة مصر الذكية أو مفتاح اللغة العربية في خامسة، ومن خريطة الوطن العربي الذكية في سادسة.
• لما كل القطع تكتمل بيتفتح التحدي الأخير، واللي يجيب ٨٠٪ يبقى بطل وياخد شهادة باسمه.
• وكمان «جولة بونص» بأسئلة جديدة من كل الدروس اللي اتلعبت، و«إنجازاتي» فيها الأوسمة.

وأثناء اللعب، زر الإيقاف ⏸ فوق بيفتح «استراحة»: كمّل، أو ابدأ من الأول، أو ارجع للخريطة.

اعملوا تحدي

1. من الصفحة الرئيسية في اللعبة دوسوا «تحدي الأصحاب» ← «اعمل تحدي جديد».
2. اختاروا درس واحد أو أكتر (أو «الوحدة كلها»)، أو «مراجعة الترم كله». لو اخترتوا كذا درس، الـ١٠ أسئلة بتتوزع عليهم. في رابعة اختاروا المادة الأول: عربي أو دراسات.
3. اكتبوا الاسم اللي هيظهر للأصحاب (الاسم الأول أو اسم دلع)، ودوسوا «اعمل الكود».
4. بيظهر كود من ٥ أرقام. دوسوا «ابعته على واتساب» عشان يروح للأصحاب كود ولينك، أو «مشاركة / نسخ».
5. دوسوا «ابدأ التحدي» والعبوا انتوا كمان.

ادخلوا تحدي صاحبكم

• افتحوا اللينك اللي وصلكم، أو اكتبوا الكود في «تحدي الأصحاب» ← «عندك كود من صاحبك؟»، أو في الصفحة الرئيسية للموقع (بتفتح اللعبة الصح لوحدها، رابعة أو خامسة أو سادسة).
• اكتبوا الاسم ودوسوا «ادخل التحدي»، وبعدين «ابدأ التحدي».

الترتيب

• بعد ما الطفل يخلّص بيشوف نتيجته وترتيبه، ومنصة للتلاتة الأوائل 🥇🥈🥉.
• اللي لسه بيلعب بيظهر جنبه «⏳ لسه بيلعب»، والترتيب بيتحدّث لوحده.
• «شارك نتيجتك» بتبعت النتيجة على واتساب، و«راجع أخطاءك» بيلعّب الطفل الأسئلة اللي غلط فيها، و«تحدي جديد» بيعمل تحدي تاني.
• «تحدياتي» جوه «تحدي الأصحاب» فيها كل التحديات اللي الطفل دخلها وميدالياته.

القواعد

• كل الأصحاب بياخدوا نفس الأسئلة بنفس الترتيب.
• أول مرة بس هي اللي بتتحسب. «العب تاني للتمرين» مش بيغيّر الترتيب.
• في خامسة وسادسة، الغلطة بتجيب تلميح ومحاولة تانية بنص النقط، والسرعة مش بتفرق. وفي رابعة مفيش قلوب في التحدي، فكل واحد بيكمّل الـ١٠ أسئلة.
• التحدي مفتوح ٧ أيام وبعدين بيتمسح لوحده، ولحد ٤٠ لاعب، يعني فصل كامل يقدر يلعب بكود واحد.
• لو النت قطع في الآخر، النتيجة بتتحفظ على الجهاز وبتتبعت لوحدها لما النت يرجع.

ابدأوا لعبة

1. من الصفحة الرئيسية في اللعبة دوسوا «ركن الألعاب» واختاروا لعبة.
2. مين هيلعب؟ ضد عزوز (الروبوت: سهل أو متوسط أو صعب)، أو اتنين على نفس الجهاز، أو مع صاحب بكود كل واحد من جهازه. في رحلة النيل ممكن لحد ٤ لاعبين.
3. الأسئلة من أنهي دروس؟ اختاروا درس واحد أو أكتر، أو «الوحدة كلها»، أو «اختار الكل». في رابعة اختاروا المادة الأول: عربي أو دراسات.
4. دوسوا «يلا نلعب!».

السؤال قبل كل دور

• إجابة صح؟ الطفل يلعب دوره. غلط؟ بيشوف الإجابة الصح والشرح، والدور بيروح للي بعده.
• عزوز (الروبوت) مش بيجاوب أسئلة، هو بيلعب بس: في السهل بيلعب زي مبتدئ، وفي الصعب بيفكر كذا حركة لقدام.
• 💡 ٣ مساعدات في كل لعبة: «مساعدة» على كارت السؤال بتشيل إجابتين غلط (وفي صح وخطأ بتظهر تلميح لو موجود)، و«أحسن حركة» في دور الطفل بتنوّر أحسن حركة على اللوحة. كل استخدام بياخد واحدة من الـ٣، والطفل شايف فاضله كام.
• بعد ما عزوز أو الصاحب يلعب، اللعبة بتستنى ثانية عشان الطفل يشوف الحركة قبل سؤاله.
• في الشطرنج: لو الملك عليه «كش»، الطفل بيلعب من غير سؤال عشان يحميه.
• في الآخر بيظهر كام سؤال الطفل جاوبه صح.
• سيبها وكمّلها بعدين: لو الطفل خرج من لعبة ضد عزوز أو على نفس الجهاز، الدور بيتحفظ. على كارت اللعبة هيظهر «⏸️ دور مستنيك»، ولما يفتحها يدوس «▶ كمّل الدور» يلاقي اللوحة زي ما سابها (أو «🗑️ امسحه»).

الألعاب

• ♟️ الشطرنج بقطع فرعونية (أو كلاسيك). مش عارفين القطع بتمشي إزاي؟ «اتعلّم الشطرنج» بيعلّم كل قطعة خطوة بخطوة، وبعدين ألغاز «كش» و«كش مات».
• 🪨 السيجة اللعبة المصرية القديمة: كل لاعب بيحط حجرين في دوره، وبعدين بيحرّك ويحاصر أحجار صاحبه.
• ⛵ رحلة النيل: لودو بمراكب. اختاروا «جولة سريعة» (مركبين لكل لاعب) أو «طويلة» (٤). ولو كل مراكب اللاعب في الميناء، الزهر بيجيب ٦ على طول عشان يبدأ بسرعة.
• 🔺 برج الأهرامات: لغز لوحدك. انقل الهرم حجر حجر بأقل عدد حركات (٣ أو ٤ أو ٥ أحجار).

لعبة تالتة ورابعة وخامسة وسادسة

• 🏃 مغامرة أنور وعزوز: لعبة أكشن لوحدك، من غير وقت. الطفل بيختار أنور أو عزوز ويجري وينط في ٣ مراحل — تالتة عربي: العمل والأمل وصفاتي الجميلة وأحب بلدي (وفيها ٥ قلوب ووحوش أبطأ)، وسادسة: الصحراء ووادي النيل والسواحل، وخامسة دراسات: صحاري مصر ومصر القديمة ومصر المستقبل، وخامسة عربي: نيلنا أمانة وفن التواصل وجمال الاختلاف، ورابعة حسب المادة: دراسات (اتجاهاتنا، مدينتنا، مصر وطننا) أو عربي (أنا وحلمي، أخلاقي.. حياتي، رسالة من أطفال مصر). الوحوش هي المشكلات اللي في الكتاب (تالتة: اليأس والكسل والخوف من الخطأ والخجل…، سادسة: الجفاف وتلوث الهواء والصيد الجائر…، خامسة: ندرة المياه العذبة وتلوث المياه والتغيرات المناخية…، وفي العربي: إلقاء القمامة في النيل والسخرية وضغط الأصدقاء، رابعة: الزحام ورمي القمامة، والكسل والسخرية وقطع الأشجار…): ينط فوقها يهزمها ويظهر له اللي الكتاب بيقوله عنها. صندوق «؟» بيطلع سؤال من الدروس اللي اخترتوها: صح = درع ونجوم، غلط = بيشوف الإجابة الصح ويكمّل. وبيلم كنوز من الكتاب (سادسة: موارد الوطن العربي ودولها، خامسة: معادن مصر وآثارها ومصادر الطاقة، وفي العربي: خطوات حل المشكلات ورحلة الرسالة وأزياء الشعوب، رابعة: البوصلة والأماكن الخدمية، والأحلام وأفعال اللطف وأفعالنا للطبيعة). لو وقع أو خلصت قلوبه بيرجع لآخر علم — مفيش خسارة. على الكمبيوتر بالأسهم والمسافة، وعلى الموبايل بزراير على الشاشة (الأحسن يلف الموبايل بالعرض).

قواعد كل لعبة مكتوبة في «إزاي بتتلعب؟ 📜» فوق شاشة اللعبة.

مع صاحب بكود

1. اختاروا «مع صاحبك بكود» واكتبوا الاسم اللي هيظهر، ودوسوا «اعمل كود اللعبة».
2. بيظهر كود من ٦ أرقام. ابعتوه على واتساب. صاحبكم يفتح اللينك أو يكتب الكود في «ركن الألعاب» أو في الصفحة الرئيسية للموقع.
3. أول ما الكل يدخل، اللعبة بتبدأ لوحدها، وكل واحد بيجاوب أسئلته على جهازه. في رحلة النيل صاحب الكود يقدر يبدأ باللي موجودين.
4. «خروج» مش خسارة: في لعبة بين اتنين، «خروج» بيوقّف اللعبة، وصاحبكم بيشوف «خرج… اللعبة مستنياه يرجع». ارجعوا من «🎮 ألعابي بالكود» في ركن الألعاب أو بنفس الكود. ولو الطفل عايز يسيبها خالص فيه زرار «🏳️ استسلم» (صاحبه يكسب).
5. اللعبة بتفضل ٧ أيام من آخر حركة وبعدين بتتمسح. بيتحفظ أونلاين الاسم اللي اتكتب والحركات بس.

للأهل

• «الإعدادات» ← «ركن الألعاب» بتقفل الركن كله. واللعب بكود بيشتغل بس لو «تحدي الأصحاب» مفتوح.

👧👦 أكتر من طفل على نفس الجهاز

كل طفل ليه اسمه وتقدّمه ونجومه لوحده، لحد ٦ أطفال على الجهاز الواحد.

ضيفوا طفل

1. في الصفحة الرئيسية للعبة، دوسوا على اسم الطفل اللي جنب «أهلًا يا…».
2. من قايمة «مين بيلعب؟» دوسوا «+ طفل جديد».
3. اكتبوا اسمه واختاروا «أنا ولد» أو «أنا بنت»، وهو يبدأ من أول المغامرة.

بدّلوا بين الأطفال

من نفس القايمة دوسوا على اسم الطفل اللي هيلعب. أو من «الإعدادات» ← «الأطفال على الجهاز ده»، وهناك كمان تقدروا تضيفوا طفل، أو تضيفوا طفل لعب قبل كده برقمه السري، أو تمسحوا لاعب (بعد تأكيد).

اعملوا رقم سري

1. اختاروا الطفل من الصفحة الرئيسية للعبة.
2. اضغطوا «🔑 احفظ تقدّمي برقم سري» في الصفحة الرئيسية للعبة (أو «الإعدادات» ← «🔑 الرقم السري») ← «اعمل رقم سري لـ…».
3. بيظهر الرقم. صوّروا الشاشة، أو دوسوا «ابعته لنفسك على واتساب»، أو اكتبوه في مكان أمين.

العبوا من جهاز تاني

1. افتحوا اللعبة ودوسوا «ابدأ المغامرة».
2. تحت خانة الاسم دوسوا «🔑 لعبت قبل كده؟ عندي رقم سري»، واكتبوا الرقم.
3. الاسم والنجوم والقطع بيرجعوا، ومن هنا ورايح الجهازين بيتحفظوا مع بعض.

• نفس الرقم شغال في رابعة وخامسة وسادسة. والطفل لما يطلع سنة، بيكمّل بنفس الرقم.
• لو الطفل لعب على جهازين، الأحسن في كل درس هو اللي بيفضل، ومفيش حاجة بتضيع.
• عشان تضيفوا طفل تاني برقمه على نفس الجهاز: «الإعدادات» ← «الأطفال على الجهاز ده» ← «🔑 ضيف طفل برقمه السري».
• الرقم دايمًا موجود في «الإعدادات» ← «🔑 الرقم السري» على أي جهاز الطفل بيلعب عليه.

من غير إنترنت: كود الحفظ

لو مش عايزين حاجة تتحفظ أونلاين، «الإعدادات» ← «كود الحفظ» بيدّيكم رابط فيه تقدّم الطفل. ابعتوه لنفسكم وافتحوه على الجهاز التاني، أو الصقوه في «استرجاع تقدّم». الكود ده بيتغيّر كل ما الطفل يتقدّم، فخدوا رابط جديد من وقت للتاني.

رسالة أو اقتراح

1. «الإعدادات» ← «ابعتلنا رأيك» ← «اكتب لنا».
2. اختاروا نوع الرسالة: اقتراح، أو مشكلة، أو سؤال، أو شكر 💙، ومين بيكتب (ولي أمر، مدرّس/ة، طفل).
3. اكتبوا رسالتكم، ولو عايزين نرد عليكم اكتبوا إيميل أو رقم (اختياري)، ودوسوا «ابعت».

سؤال فيه غلط

1. بعد ما تجاوبوا على السؤال، دوسوا «في غلط في السؤال ده؟» تحت الشرح.
2. اختاروا المشكلة: الإجابة الصح غلط، أو السؤال مش واضح، أو غلطة إملائية، أو حاجة تانية.
3. اكتبوا التفاصيل لو حابين (مثلًا رقم الصفحة في الكتاب)، ودوسوا «ابعت».